أحلام على الأرصفة بين الهدم والانتظار… أهالى الطريق الأبيض بالجيزة يصرخون: حقنا فين؟

كتب: حازم رفعت

في مشهد مؤلم يتكرر يوميًا على الطريق الأبيض التابع لمحافظة الجيزة، يعيش الأهالي حالة من القهر والضياع بعد هدم مئات البيوت وتحويل الأراضي الزراعية إلى محلات تجارية، بينما التعويضات الموعودة لا تزال حبرًا على ورق منذ أكثر من ثلاث سنوات.

يقول أحد المتضررين: «بقينا في الشارع، لا بيت ولا أرض ولا حتى تعويض… وفيه ناس وصلت بيهم الحالة للانتحار من شدة القهر»، مضيفًا أن هناك، تم تسجيل ثلاث حالات إنتحار بين شباب المنطقة، في ظل تجاهل المسؤولين وتباطؤ الإجراءات.

وفي نفس السياق تروي إحدى السيدات: “أنا عندي شقة كنت مجهزاها لابني عشان يتجوز فيها، النهاردة الشقة راحت والأرض راحت، وخطيبته سابته وبقى في الشارع؛ إزاي نعيش كده؟.

ويضيف متضرر آخر قائلًا: «إحنا تعبنا من كُتر ما بنروح المحافظة والمساحة، وكل مرة يقولوا لنا استنوا، بقالنا 3 سنين مستنيين حقنا ومفيش جديد».

ويتابع أحد الأهالي: «إحنا مش ضد التطوير، لكن مش معقول نكون أغنى من الدولة ونتنازل عن كل حاجة ونترمي في الشارع؛ الرحمة حلوة، ارحمونا عشان ربنا يرحمكم».

وتصرخ سيدة أخرى: “كل واحدة عندها عيلة و3 عيال بقالها 3 سنين في الشارع مش عارفة تاخد حقها، تعبنا وجبنا آخرنا.”

وسط هذه المعاناة، يرفع الأهالي صوتهم مناشدين الرئيس عبد الفتاح السيسي قائلين: «إحنا انتخبناك يا سيسي عشان تجيب لنا حقنا، مش انت نصير السيدات؟ إدينا حقنا، إحنا اتظلمنا وتعبنا خلاص».

بين طرقات المحافظة وأروقة المساحة، يظل الأهالي عالقين في دائرة من الوعود المؤجلة، بينما تتزايد الضغوط النفسية والاجتماعية يومًا بعد يوم. ويبقى السؤال المؤلم معلقًا: “حق المواطن فين يا دولة؟”