تحدث يوسف عبد العزيز نجم منتخب مصر لتنس الطاولة، والمصنف رقم 51 على مستوى العالم، عن كواليس النجاحات الأخيرة التي حققها على المستوى الفردي والزوجي رفقة زميله محمد البيلي.

 

واقتحم يوسف عبد العزيز رفقة محمد البيلي قائمة أفضل 10 فرق حول العالم، لينجحا في تحقيق إنجاز تاريخي لأول مرة باسم مصر، ويتطلع الثنائي لتحقيق إنجاز جديد في بطولة العالم 2027، بعدما حصدا المركز الخامس في البطولة العام الماضي.

وحاور "المصري" يوسف عبد العزيز، ليكشف عن كواليس نجاحه مع محمد البيلي، واستعداده للخطوات المقبلة والتحضير لدورة الألعاب الأولمبية لوس أنجلوس 2028.

 

التفاهم سر نجاحي مع البيلي

وعن كواليس نجاحه مع محمد البيلي، والصعود للمركز العاشر في قائمة أفضل الفرق حول العالم، قال يوسف عبد العزيز: "إحنا بقالنا فترة كبيرة بنلعب مع بعض، من قبل أولمبياد باريس اللي فاتت كمان، وكنا بنشارك مع بعض في الزوجي كتير، ده خلّى كل واحد فينا فاهم التاني كويس جدًا، سواء جوه الملعب أو برّه، وبقى بينا تفاهم كبير. وده كان من أهم الأسباب اللي خلتنا نطلع بشكل كويس الفترة اللي فاتت".

 

كيفية التعامل مع الضغط والإصابات

وأوضح نجم منتخب تنس الطاولة، طرق تعامله مع الضغط الذي يتعرض له اللاعب أثناء خوض المباريات، فضلا تعاملهم أثناء الإصابات المفاجئة، حيث صرح: "اتعلمنا إزاي نتعامل مع ضغط البطولات، ومع الإصابات، ومع أي ظروف صعبة ممكن نقابلها، لعبنا بطولات كتير سوا، فبقينا عارفين في وقت الضغط إزاي نشجع بعض ونحفّز بعض على قد ما نقدر، الإصابات طبعًا واردة، بس بنحاول نتفاداها بالتجهيز الكويس وبإننا ناخد احتياطاتنا دايمًا".

 

 

تأثير العلاقات خارج الملعب على الأداء

وأضاف عبد العزيز عن العلاقات بين لاعبي الفرق وتأثيرها على الأداء أثناء المباريات: أكيد العلاقة بين اللعيبة بتفرق جدًا في الأداء. طول ما إحنا على طول بنتمرن سوا وعلاقتنا كويسة، ده بيبان في الماتشات. بنفهم بعض بسرعة، ولو حد فينا متوتر أو عليه ضغط، التاني بيحاول يهدّيه ويسانده. فطبيعي إن العلاقة بينا تأثر بشكل كبير على مستوانا جوه الملعب".

 

وتابع يوسف عبد العزيز: "هدفنا بعد ما دخلنا ضمن أفضل 20 على العالم إننا نوصل للتوب 5، ونحقق نتائج أحسن من اللي عملناها قبل كده، خصوصًا مع اقتراب الأولمبياد الجاية".

 

طلب عاجل من نجم تنس الطاولة قبل أولمبياد 28

وواصل يوسف عبد العزيز، مطالبا بضرورة التعجيل في وضع خطة مناسبة للتحضير لدورة الألعاب الأولمبية الصيفية 2028، والمقرر إقامتها في لوس أنجلوس، حيث قال: "بالنسبة للخطة، إحنا منتظرين خطة واضحة للفترة اللي جاية، لازم يبقى فيه تخطيط للسنين اللي قبل الأولمبياد، عشان يبقى عندنا هدف واضح ونقدر نحقق نتيجة تفرّح الناس".

 

تأثير الإصابة على نجم منتخب تنس الطاولة

واختتم: "أما موضوع الخروج من بطولة أو معسكر، فده نصيب وقدر. الحمد لله شاركت في بطولات عالم كتير، ولعبت في الأولمبياد اللي فاتت وكنت ضمن المنتخب الأساسي، فبقى عندي خبرة. طبيعي أي لاعب يقابله صعوبات أو مفاجآت، بس المهم إنه يتعلم منها ويرجع أقوى، سواء كانت إصابة أو خسارة، وإن شاء الله نرجع في أحسن مستوى".