نجح محمد البيلي ويوسف عبدالعزيز في أن يكونا محط اهتمام جماهير تنس الطاولة، بعد تحقيق إنجاز تاريخي باسم مصر ووصولهما إلى قائمة أفضل 10 فرق في العالم في التصنيف العالمي.

 

وفي حوار حصري مع لاعب تنس الطاولة محمد البيلي، ليكشف عن أسرار شراكته الناجحة مع زميله يوسف عبدالعزيز، وعن أصعب اللحظات التي واجهتهما خلال مسيرتهما الرياضية. 

وتحدث البيلي عن التحضير التكتيكي، التعامل مع الضغط والإصابات، وأهمية العلاقة خارج الملعب في تحقيق الانتصارات، كما يشارك طموحاته المستقبلية وخططه نحو الوصول لأفضل المراتب على مستوى العالم والمنافسة في الأولمبياد المقبل.

وإلى نص الحوار.. 

 

  • كيف تصف العلاقة بينك وبين يوسف على أرض الملعب؟

الحمد لله، التأقلم موجود. إحنا بنلعب مع بعض من قبل أولمبياد باريس، وبقينا متعودين على بعض جدًا، لعبنا معًا في بطولات كتير؛ كسبنا بطولات، وفي بطولات تانية ما حالفناش فيها التوفيق. 

لما تلعب مع حد فترة طويلة، بتبقى حافظه وحافظك، وبتفهموا بعض بنظرة أو إحساس، وده عنصر مهم جدًا في أي لعبة، وفي الرياضة عمومًا.

 

  • هل هذا التأقلم يساعدكم في التحضير للمباريات؟ وهل هو السبب في الإنجاز الأخير؟

أكيد، التحضير مهم جدًا. قبل أي مباراة بنجيب فيديوهات للخصوم ونتفرج عليها سوا، سواء على الموبايل أو على التلفزيون، ونحلل الأداء ونشوف نقاط القوة والضعف ونلعب عليها. 

التحضير التكتيكي ده بيفرق معانا جدًا، سواء مع وجود مدرب أو حتى لو حللنا مع بعض.

 

  • كيف تتعاملون مع الضغط والإصابات المفاجئة؟

الضغط من أصعب الحاجات في الرياضة. نحاول نتعامل معاه، لكنه مرهق، خصوصًا مع الإصابات زي إصابة يوسف الأخيرة. المهم عندي صحته ورجله تبقى كويسة، ومش مهم أي حاجة تانية. 

كلنا كنا مصابين، وبنسعى نوضح للناس الصورة الصح على السوشيال ميديا، والحمد لله الناس بتحبنا وبتدعمنا.

 

  • هل للعلاقة خارج الملعب تأثير على الأداء؟

طبعًا. أي شراكة، سواء في الرياضة أو الشغل، لو العلاقة كويسة بين الطرفين، النجاح بيبقى أكبر بكتير. لو العلاقة مش مستقرة، النجاح مش بيبقى كامل. الحمد لله علاقتنا قوية وإن شاء الله تفضل دايمًا كده.

 

  • ما هي أهدافكم المستقبلية بعد إنجاز التصنيف العالمي؟

بعد ما بقينا ضمن أفضل 10 فرق في العالم، هدفنا نوصل لأول خمسة. هنشارك في بطولات أكتر ونحاول نكسب ونطور نفسنا، وكمان الاستعداد لبطولة العالم وبعدها الأولمبياد. 

 

  • متى تبدأ الاستعداد لأولمبياد لوس أنجلوس 28؟

استعدادنا للأولمبياد بيبدأ بدري جدًا، سواء على مستوى الزوجي أو الفردي، وعلى المستوى الفردي أنا كمان بتمرن وببذل أقصى مجهود، وإن شاء الله أحقق نجاحات زي اللي بعملها في الزوجي وأحسن كمان.